Louise ydw i, ac rydw i’n sgriniwr clyw babanod yn Ysbyty Singleton yn Abertawe.
Louise New Born hearing screener
Fel sgriniwr, rwy'n sgrinio clyw babis newydd-anedig, i weld a ydyn nhw wedi colli’u clyw. Mae hyn yn sicrhau bod rhieni’n cael y cymorth a’r gefnogaeth angenrheidiol o’r dechrau er mwyn lleihau cymaint ag y bo modd ar unrhyw oedi wrth ddatblygu iaith a lleferydd os gwelwn ni fod y babi wedi colli clyw mewn rhyw fodd. Fe fyddwn ni’n sgrinio ar wardiau ôl-enedigol, gan sgrinio babanod sydd weithiau’n ddim ond ychydig oriau oed. Fe fyddwn ni hefyd yn sgrinio ar unedau Gofal Arbennig ac yn y gymuned yn achos babanod na fydd yn cael eu sgrinio yn yr ysbyty neu y bydd angen eu sgrinio nhw eto.
Byddwn ni’r sgrinwyr yn gweithio ochr yn ochr â gweithwyr gofal iechyd proffesiynol eraill, fel bydwragedd, nyrsys meithrinfa a phediatregyddion. Yn y gymuned, byddwn ni’n cydweithio â bydwragedd cymunedol, ymwelwyr iechyd a meddygon teulu.
Mae ein gwaith ni’n golygu cyfuniad o waith gweinyddol a chyswllt clinigol wyneb yn wyneb. Fe fyddwn ni’n dechrau ein diwrnod yn y swyddfa gan brofi’r offer rydyn ni’n ei ddefnyddio i sgrinio. Fe fyddwn ni’n edrych drwy’r cronfeydd data o fabanod sydd wedi’u geni yn Singleton, ac yna’n mynd i’r wardiau i gael casglu gwybodaeth y babanod sy'n dal i fod yno, a'r rhai sydd wedi'u rhyddhau cyn dechrau’r broses o sgrinio fel y gallwn wneud apwyntiadau clinig ar gyfer y rhai a gollwyd gan wneud
yn siŵr bod pob babi yn cael y cyfle i gael ei sgrinio. Fe fyddwn i wedyn yn mynd i’r ward i esbonio’r broses sgrinio i’r rhieni ac i sicrhau eu bod nhw’n cydsynio i ni sgrinio. Mae’r broses sgrinio yn golygu rhoi clustffon meddal yng nghlustiau’r babanod, a byddan nhw’n clywed synau clicio tawel. Mae ein hoffer yn rhoi gwybod i ni’n syth sut mae’r babi’n ymateb. Ar ôl cwblhau'r Sgrinio, rydym yn dychwelyd i'n swyddfa ac yn cofnodi'n gywir data’r prawf clinigol sy'n berthnasol i'r broses sgrinio. Yn y prynhawn, byddwn ni’n cynnal clinigau cymunedol, yn trefnu ac yn creu apwyntiadau i fabanod yn y clinig, ac yn gwneud amryw o dasgau gweinyddol eraill.
Bydd yr isadran sgrinio yn gofyn i ymgeiswyr gael safon dda o addysg llythrennedd a rhifedd, a chymwysterau TGAU neu gyfatebol. Oherwydd cyd-destun a natur y swydd, mae profiad o weithio gyda theuluoedd, babanod a gweithwyr iechyd proffesiynol eraill mewn amgylchedd clinigol yn fuddiol, gan fod sgiliau cyfathrebu a sgiliau trin pobl yn hollbwysig yn y swydd hon.
Rhaid i ymgeiswyr ddangos ymrwymiad i gael hyfforddiant mewnol, sy’n cynnwys Rhaglen Sefydlu Gweithwyr Cymorth Gofal Iechyd, yn ogystal â gweithio tuag at ddiploma Lefel 3 mewn Sgrinio Clyw Babanod. Mae hyfforddiant parhaus o fewn y rôl ac mae yna hyfforddiant a dysgu gorfodol sydd angen ei gyflawni i fod yn sgriniwr gymwys ac i fod yn gyfredol â'r holl bolisïau a chanllawiau.
Mae’r rheowyr yn rhoi anogaeth a chyfleoedd i bobl wneud cynnydd ym maes sgrinio clyw babanod. Bydd Sgrinwyr Clyw Babanod yn cael eu penodi ar fand 2, ond yn dringo’n awtomatig i swyddi band 3 pan fyddwn ni’n cwblhau cymwysterau lefel 3. Mae cyfleoedd i wneud cais am swyddi Uwch Sgrinwyr band 4 yn y gwasanaeth, sy’n cyfuno gwaith sgrinio â dyletswyddau hyfforddi a dyletswyddau technegol.
Rydw i’n mwynhau fy ngwaith fel Sgriniwr Clyw Babanod, gan na fydd yr un diwrnod fyth yr un fath â’r llall, ac mae cyfle i gwrdd ag amrywiaeth eang o bobl, gyda'r bonws o adnabod babanod a allai fod â cholled clyw ac i fod yn ganolog i ddechrau eu taith i fyw ac addasu i hyn.