Leigha ydw i, rwy’n ddeunaw oed ac yn dod o Birmingham. Rwy’n y flwyddyn gyntaf ym Mhrifysgol Caerdydd yn astudio Radiotherapi ac Oncoleg.
Leigha Yardley - Student Radiographer
Beth wnaeth i chi benderfynu astudio Radiograffeg?
Dewisais astudio radiotherapi oherwydd bod canser wedi effeithio ar fy nheulu sawl gwaith. Yn fwyaf arwyddocaol, cafodd fy mam ddiagnosis a thriniaeth radiotherapi ar gyfer canser y tonsil pan oeddwn i’n un ar bymtheg oed. Felly, profiad fy mam wnaeth fy ysgogi i gychwyn ar fy nhaith fy hun i astudio radiotherapi. Roeddwn i’n gobeithio dod yn radiograffydd therapiwtig yn y GIG un diwrnod, er mwyn talu’n ôl am y gwaith amhrisiadwy a helpodd fy nheulu.
Pa bynciau wnaethoch chi eu hastudio cyn mynd i’r brifysgol?
Cyn mynd i’r brifysgol, fe wnes i astudio Bioleg a Chemeg Safon Uwch yn ogystal â BTEC Lefel 3 mewn Iechyd a Gofal Cymdeithasol. Roedd y gymysgedd o bynciau gwyddoniaeth Safon Uwch yn help ar gyfer y modiwlau ffiseg ac oncoleg yn fy nysgu academaidd. Yn fy marn i, mae’r maes iechyd a gofal cymdeithasol, wedi rhoi sgiliau cyfathrebu gwerthfawr i mi i gefnogi fy lleoliadau clinigol.
Beth ydych chi’n ei fwynhau am y cwrs?
Rwy’n credu mai’r boddhad o wybod fy mod wedi gwneud i glaf chwerthin neu wedi’i helpu yn ystod ei daith ganser yw un o’r pethau mwyaf boddhaus am y cwrs, yn ogystal ag ochr academaidd y radd sy’n fy ngalluogi i ddatblygu dealltwriaeth o’r manylion a’r manylder sydd ym mhob triniaeth unigol.
Beth mae’r lleoliadau clinigol yn ei olygu?
Cynhelir lleoliadau clinigol Prifysgol Caerdydd yn nhair canolfan radiotherapi GIG Cymru yng Nghaerdydd, Abertawe a Gogledd Cymru. Mae’r cylchdroi’n caniatáu i fyfyrwyr fel fi ddatblygu’r gallu i addasu fy ymarfer i gyd-fynd â’r technegau sydd gan wahanol ganolfannau. Yn ystod fy mlwyddyn gyntaf, roeddwn wedi cwblhau gwerth 10 wythnos o leoliad, sy’n fuddiol iawn i allu rhoi hwb i fy natblygiad proffesiynol gan fy nghyflwyno i fyd radiograffeg.
Pa fathau o rolau mae Radiograffyddion yn eu cyflawni?
Mae radiograffyddion yn ymwneud â llawer o gamau’r broses drin fel sganio’r claf i baratoi ar gyfer cynllunio triniaeth, cynllunio’r driniaeth, rhoi’r driniaeth ac yna tywys y cleifion drwy eu symptomau a’u helpu i ddod yn ôl i drefn ar ôl i’r cwrs o driniaeth ddod i ben. Mae’r dewis o rolau niferus y gallwn weithio tuag atyn nhw yn y dyfodol o ddiddordeb i mi ac yn rhywbeth sy’n fy ysbrydoli fel myfyriwr.
Fyddech chi’n argymell astudio Radiograffeg?
Byddwn yn bendant yn argymell y cwrs hwn i’r rheini sydd â diddordeb yn y sector gofal iechyd ac a fyddai’n hoffi gwneud gwahaniaeth i fywydau pobl. Yn fy marn i, mae gan y cwrs y cydbwysedd cywir o wyddoniaeth ac anogaeth. Mae gwyddoniaeth wedi ennyn fy niddordeb erioed, felly roeddwn i’n gwybod fy mod i eisiau dilyn cwrs a oedd yn cyfuno fy niddordeb mewn ffiseg a chemeg ynghyd â gofal cleifion. Mae rôl gofalu am gleifion yn mynd ymhellach na’r claf sy’n cael triniaeth yn unig. Mae hefyd yn cynnwys y teuluoedd sy’n rhan o daith eu hanwyliaid. Mae’r boddhad o roi cymorth i deuluoedd mewn cyfnod o’r fath angen, yn ogystal â darparu triniaethau sydd o bosib yn achub bywyd, yn rheswm pam y byddwn yn argymell astudio radiotherapi.
Beth yw eich nodau gyrfa?
Ar ôl imi gwblhau’r cwrs, rwy’n gobeithio dod yn radiograffydd yn y GIG a chael gyrfa y byddaf yn parhau i'w mwynhau. Ar ôl blwyddyn o astudio, rwyf wedi datblygu diddordeb mewn radiograffeg adolygu a thrin, ac yn fwy penodol adolygu cleifion canser y pen a’r gwddf. Felly, rwy’n credu mai fy uchelgais ar gyfer y dyfodol yw canolbwyntio ar y posibilrwydd o arbenigo mewn gofalu am gleifion canser y pen a’r gwddf, gan obeithio rhoi’r un lefel o ofal anhygoel i gleifion ag a gafodd fy mam gan y GIG yn 2019.