O Faetheg Ddynol A Deieteg Ym Met Caerdydd I Weithio Fel Deietegydd Cofrestredig

Gwaith y dydd wedi darfod am ddiwrnod arall, beth ddylwn i ei wneud nawr? Mae'n teimlo mor rhyfedd cyrraedd adref a pheidio â gorfod gweithio ar aseiniad neu adolygu ar gyfer arholiad. Fe wnaeth y dair blynedd hynny wibio heibio...

Nokhuthula Nyoni

Ychydig amdanaf fi

Helo, fy enw i yw Nokhuthula ac mi raddais i yn 2020 gyda gradd Anrhydedd Dosbarth Cyntaf mewn Maetheg Ddynol a Deieteg o Brifysgol Metropolitan Caerdydd. Mae Maetheg Ddynol a Deieteteg yn gwrs tair blynedd a all arwain at swydd yn y GIG yn gweithio fel Deietegydd Cofrestredig.

Mae rôl Deietegydd yn amrywiol; o faes chwaraeon, i bractis preifat, i weithio mewn ysbyty.Mae’r amrywiaeth a ddaeth yn ei sgil drwy gydol y cwrs yn un o'r pethau mwyaf heriol i mi ei wneud erioed, ond yn sicr y peth mwyaf gwerthfawr. Roedd yr amser a dreuliais i ar y rhaglen Maetheg Ddynol a Deieteg ym Met Caerdydd, er yn heriol, yn bleserus.

Fy lleoliadau prifysgol

I mi, y rhan orau o'r rhaglen oedd y tri lleoliad clinigol, roedd fy lleoliad cyntaf a'r ail ym Mwrdd Iechyd Prifysgol Betsi Cadwaladr, tra’r oedd fy lleoliad terfynol gyda Bwrdd Iechyd Prifysgol Aneurin Bevan. 

Roedd y lleoliadau yn fy ngalluogi i gyfuno'r holl theori yr oeddwn wedi’i dysgu a'i rhoi ar waith; o'r modiwl Biocemeg a Ffisioleg Faethol a wnaeth fy nghynorthwyo o ran fy nealltwriaeth o lwybrau metabolig, i'r modiwl Anatomeg a Ffisioleg Ddynol a wnaeth fy helpu i ddatblygu adnabyddiaeth o’r llwybr Gastroberfeddol (GI) a sut mae'n gweithio. Mae'r adnabyddiaeth hon yn arbennig o ddefnyddiol gyda chleifion sydd wedi cael ileostomi, colostomi neu jejwnostomi gan ei fod yn helpu i fesur y tebygolrwydd o ddiffygion microfaethynnau. Fe wnaeth yr adnabyddiaeth hon gydblethu’n dda gyda’r modiwlau eraill y gwnes i eu hastudio ar y cwrs megis Deieteg Arbenigol ac Egwyddorion Deieteg. Roedd y lleoliad yn fy mharatoi’n drylwyr ar gyfer byd cyflogaeth.

Fy rôl fel Deietegydd Cofrestredig

Tra’r oeddwn i ar Leoliad Tri ym mis Mawrth 2020, fe lwyddais i i gael fy swydd gyntaf fel Deietegydd Band 5 — pedwar mis cyn graddio — yn Ysbyty Llwynhelyg, sy'n rhan o Fwrdd Iechyd Prifysgol Hywel Dda yn harddwch Sir Benfro.

Wrth ysgrifennu'r blog hwn, rydw i newydd orffen fy nhrydedd wythnos fel dietegydd ac rydw i wrth fy modd; mae gen i bum ward wahanol a dydy’r naill ddiwrnod a’r llall byth yr un fath. Rydw i’n dechrau gweithio am 8:30yb ond rydw i’n tueddu i gyrraedd yno tua 8:15yb i ymgartrefu a gwneud paned o de. Wedyn rydw i’n edrych trwy gardiau cofnod cleifion a biocemeg gwaed y cleifion mewnol sydd i'w gweld y diwrnod hwnnw, sy'n cynnwys adolygiadau ac atgyfeiriadau newydd. Ar ôl edrych trwy’r rhestr gleifion yn drylwyr a gwneud nodiadau, rydw i’n anelu am y wardiau. Gall asesiad claf newydd gymryd hyd at 45 munud a gall adolygiad gymryd 20-30 munud. 

Rydw i’n hynod angerddol dros y proffesiwn hwn, mae'n un yr ydw i’n ei garu, rydw i’n deffro bob bore yn edrych ymlaen at wneud gwahaniaeth.