Pan yn yr ysgol, roeddwn yn barod i ddod yn heddwas, gan fy mod eisiau helpu pobl ac roeddwn i'n teimlo mai dyna'r yrfa fwyaf addas i mi. Ar ôl ysgol a choleg, bûm yn gweithio mewn rolau manwerthu a gweinyddol gan nad oedd fy heddlu lleol yn recriwtio swyddogion am sawl blwyddyn.
Chloe Scott - My Journey Into Nursing
Yn 21 mlwydd oed, nes i ganfod fy hun mewn rôl adnoddau dynol i'r heddlu, a fyddai, yn fy marn i, yn gyfle gwych i mi fynd i mewn i'r sefydliad a gweld sut mae'r heddlu'n gweithredu. Dysgais lawer, cynhaliais recriwtio a phenodi (gan gynnwys cyfweliadau), rheoli presenoldeb, cefnogi'r heddlu a staff mewn unrhyw heriau a wynebir yn y gweithle a llawer mwy.
Ar ôl blwyddyn neu ddwy, gadewais yr heddlu a phenderfynu y byddai gweithio ym maes gofal iechyd yn fwy addas i mi, ond nid oeddwn wedi penderfynu yn llwyr ym mha rôl. Fe wnes i wirfoddoli fel ymatebwr cyntaf cymunedol ar gyfer y gwasanaeth ambiwlans, gan roi fy amser hamdden i fynd i gleifion yn fy ardal leol.
Cofrestrais hefyd ar gwrs mynediad gwyddor iechyd yn fy ngholeg lleol ac astudiais lawn amser dros flwyddyn, wrth weithio oriau rhan-amser yn fy nghyngor lleol. Roedd y cwrs hwn yn wych, yn enwedig fel myfyriwr aeddfed. Fe wnaeth wir fy mharatoi ar gyfer y brifysgol. Gwnaethom ymdrin ag ystod eang o bynciau, tra hefyd yn cael ein pennau o gwmpas ysgrifennu a chyfeirnodi academaidd. Fe wnaeth hefyd ein paratoi ni i fod yn drefnus a rheoli ein llwyth gwaith yn dda.
Ar ôl cwblhau'r cwrs mynediad, dechreuais astudio ar gyfer gradd mewn therapi galwedigaethol. Fodd bynnag, ar ôl ychydig fisoedd, roeddwn i'n gwybod nad oedd hynny i mi. Syrthiais yn ôl i'm hen fyd a dechrau gweithio i Wasanaeth Tân ac Achub Gogledd Cymru ac roeddwn i wrth fy modd â fy rôl yno.
Gweithiais fel uwch gynghorydd adnoddau dynol, wedi'i leoli yn eu pencadlys yn St Asaph ac roedd fy rôl yn golygu fy mod yn gyfrifol am yr holl faterion cyflogaeth ar draws ardal ddaearyddol o'r gwasanaeth. Roeddwn hefyd yn arwain iechyd galwedigaethol y Gwasanaeth, byddwn yn rheoli'r contractau a oedd gennym gyda'n darparwyr, yn ogystal â sicrhau bod ein gweithwyr mor hapus ac iach â phosibl yn eu gwaith.
Roedd y rôl hon yn heriol ond yn werth chweil, ond yn wir, roeddwn i'n gwybod nad dyna le byddwn i'n aros.
Roedd cefnogi diffoddwyr tân a staff cymorth gydag iechyd a lles fel rhan o'm rôl wedi gwneud i'm hangerdd dros ofal iechyd dyfu ymhellach.
Cefais bach o salwch fy hun yn 2017 a gwelais pa mor anhygoel oedd y staff nyrsio yn yr ysbyty. Hwn oedd y catalydd ar gyfer newid! … Ai nyrsio oedd yr yrfa i mi?
Yn 2018 gadewais y Gwasanaeth a dechrau Baglor Nyrsio (Oedolion) ym Mhrifysgol Bangor. Roeddwn i mor gyffrous i ddechrau ac roeddwn i'n gwybod y funud es i mewn i'r ddarlithfa ar fy niwrnod cyntaf, fy mod i wedi gwneud y penderfyniad gorau.
Cawsom gwpl o fisoedd o theori yn y brifysgol cyn cael ein rhyddhau i leoliad clinigol. Roedd fy lleoliad cyntaf mewn ysbyty cymunedol. Roedd y gwaith yn canolbwyntio ar ofalu am yr henoed a gofalu am gleifion a oedd yn agosáu at ddiwedd eu hoes.
Roeddwn i’n nerfus gan nad oedd gen i unrhyw brofiad gofal mewn gwirionedd. Fodd bynnag, roedd y tîm yno yn wych ac wedi mynd â mi o dan eu hadenydd a chaniatáu i mi ymarfer holl sgiliau sylfaenol gofal nyrsio. Ni fyddaf byth yn anghofio'r lleoliad cyntaf.... yr oedd yno lle oeddwn i’n gwybod 100% bod nyrsio oedd yr hyn yr oeddwn am ei wneud.
Ers hynny, rwyf wedi cael amrywiaeth o wahanol leoliadau gan gynnwys cardioleg (calon), ystafell IV (lleoliad clinig lle mae cleifion yn derbyn triniaeth fel claf allanol), damweiniau ac achosion brys, offthalmoleg (llygaid) a nyrsio cymunedol (mynd allan i gartrefi pobl) .
Rwyf wedi dysgu cymaint ac wedi cwrdd â chymaint o bobl anhygoel, yn gleifion/gofalwyr a gweithwyr proffesiynol. Mae gan nyrsio byd o gyfle a gyda phob lleoliad rydw i'n mynd arno, dwi’n dod o hyd i fwy fyth - nid yw byth yn dod i ben!
Byddaf yn 31 mlwydd oed erbyn i mi gymhwyso haf nesaf. Efallai fod hynny'n ymddangos yn hen i rai pobl, ond nid oes oedran cywir neu anghywir i ddechrau eich taith nyrsio. Mae gen i ffrindiau a oedd yn 18 mlwydd oed ac eraill a oedd yn eu 50au pan ddechreuon nhw eu gradd nyrsio.
Nid wyf wedi penderfynu ble rwyf am weithio pan fyddaf yn gymwys eto, ond gwn, lle bynnag y bydd, y bydd cymaint o gyfleoedd i mi barhau i ddysgu a harddwch nyrsio yw y gallwch weithio mewn cynifer o feysydd, arbenigeddau, unedau, clinigau, wardiau, meddygfeydd ac ati. Mae'r rhestr yn mynd ymlaen!
Mae nyrsio wedi rhoi cymaint o gyfleoedd i mi ac mae'n caniatáu ichi gwrdd â chymaint o bobl anhygoel. Fe welwch bobl ar eu gwaethaf ac ar eu gorau. Byddwch yn wynebu heriau sy'n caniatáu ichi dyfu fel person. Yn bwysicaf oll, byddwch chi'n teimlo balchder yn eich gwaith, gan wybod eich bod chi wedi helpu rhywun bob dydd. Nid oes llawer o yrfaoedd a all roi hynny i chi.